|
Nýr Ford Mondeo ST 200/ST220: Merkilegur bíll - athyglisvert verð Á undanförnum 25 árum hefur Ford tekist að framleiða hvern fólksbílinn af öðrum sem slegið hafa sölumet og margir þeirra hafa hlotið titilinn ,,Bíll ársins í Evrópu". Ford hefur tekist jafn vel ef ekki betur upp á bandarískum markaði þrátt fyrir að stundum sé sagt að bandarískir og evrópskir bílar eigi næsta fátt sameiginlegt annað en að hafa hjól.
Það er ekki mikill vandi að framleiða góðan bíl ef engu máli skiptir hvað hann kostar. Að hanna og framleiða bíl, sem uppfyllir kröfur og óskir stærsta kaupendahópsins á markaðnum og er jafnframt hægt að selja á samkeppnisfæru verði án taps er hins vegar galdurinn sem allir bílaframleiðendur vildu hafa á valdi sínu. Á miðjum 9. áratugnum voru það Ford Fiesta, Escort og Sierra sem toppuðu sölulistana á vesturevrópska markaðnum. Á miðjum 10. áratugnum voru það Ford Fiesta, Escort og Mondeo (og nú Focus og Mondeo). Eftir að hafa selt 3 milljónir Sierra á árunum 1982 til og með 1993 leysti Mondeo hann af hólmi sem árgerð 1994. Mondeo var þá nýr bíll frá grunni og mjög ólíkur Sierra. Nægir að nefna þann grundvallarmun að Mondeo, sem var með 10 sm meira hjólhaf er framdrifinn en Sierra afturdrifinn. Fyrsta kynslóðin af Mondeo seldist vel þrátt fyrir að bíllinn þætti ekki sérlega spennandi. Hann hafði praktíska kosti umfram keppinauta á borð við Nissan Primera, VW Vento, Toyota Carina o.fl. þótt t.d. mjög vel búinn miðað við verð. Með hverju árinu var Mondeo endurbættur þar til önnur kynslóðin kom á markaðinn sem árgerð 2002 sl. vor. Nýi Mondeo er verulega mikið breyttur. Segja má að hann sé ,,hálfum flokki" stærri en fyrirrennarinn og hafi sá þótt lítið spennandi í upphafi hafa þeir Ford menn greinilega ákveðið að forðast þann stimpil því nýi Mondeo er bíll með mjög ákveðinn og sterkan karakter - án efa mest spennandi bíllinn í sínum stærðarflokki og stendur nú vel uppi í hárinu á því besta sem Citroën og Volkswagen hafa fram að tefla sem keppinautum. Það væri þá helst að Renault gætii státað af einhverju sambærilegu. Innrétting og öryggisbúnaður Innréttingin er öðru vísi en maður á að venjast í Ford - mælaborðið er t.d. með ólíku sniði, bæði er að efnið er öðru vísi og hönnunin betur heppnuð með mæla og stjórntæki formuð og staðsett nákvæmlega þar sem manni finnst eðlilegast. Stillingar á stýrishjóli og bílstjórastól bjóða upp á samstillingu sem eykur bæði þægindi og öryggistilfinningu í akstri auk þess sem stólarnir eru hæfilega mikið bólstraðir, styðja vel við líkamann - eru hvorki of mjúkir né of harðir. Það vekur t.d. sérstaka athygli að í þessum bíl er gert ráð fyrir því að mjög lágvaxið fólk geti einnig látið fara vel um sig undir stýri - en oft vill verða misbrestur á því í bílum af meðalstærð og stærri. Mér sýnist einnig vera gert ráð fyrir því að þeir sem eru ríflega á lengdina geti einnig vel við unað. Um rýmið er annars það að segja að jafnvel þótt bílstjórastóllinn sé í öftustu stöðu er samt ágætt fótarými fyrir farþega, jafnvel af stærri gerðinni, í sætinu fyrir aftan. Höfuðrými er yfir meðallagi bæði fram í og aftur í. Mér sýnist innanrýmið í Mondeo vera í svipuðum flokki og í Peugeot 605 hér forðum en eins og einhverjir muna þá þótti það með ólíkindum. Það segir ef til vill talsvert um Ford Mondeo að hann er áberandi rýmri að innan en td. bæði BMW 300-bíllinn og Volvo S60. Í innréttingunni eru ágætar hirslur, aftursæti fellur vel fram og farangurs- og flutningsrými rífleg. Og sem fyrr er Mondeo mjög vel búinn bíll. Sem dæmi þá er auk alls venjulegs staðalbúnaðar, hallastillanleg ökuljós, upphitaðir framstólar og bílstjórastóll með rafstillanlegri hæð í Mondeo Ambient sem kostar, beinskiptur, innan við 2 m.kr. Í Mondeo Ambient Trend sem kostar 2,080 mkr. beinskiptur er auk þess sjálfvirk rafhitun í framrúðu sem bræðir snjó og ís af á augabragði. Önnur sterk hlið á Mondeo er vel útfærður öryggisbúnaður sem er meiri og fullkomnari en maður á von á í bíl í þessum stærðarflokki sem kostar innan við 2 m.kr. Nefna má 6 loftpúða, hnakkapúða við öll 5 sæti, öll bílbeltin eru með sjálfvirkri strekkjun og speglar með víðsjónarsviði. Nýi Mondeo af gerðinni ST220 er með sérstakt tölvukerfi til að stýra loftpúðum við árekstur. Kerfið notar skynjara til að ,,lesa" högg og beitir loftpúðunum með tilliti til þess þannig að þeir veiti sem mesta vernd. Afl og aksturseiginleikar Ford Mondeo er með þessa dæmigerðu evrópsku aksturseiginleika sem bílablaðamenn kvarta oft undan að vanti en kvarta svo undan því að bíll sé harður á fjöðrunum þegar þeim er til að dreifa. Modeo er vissulega nokkuð stinnur á fjöðrunum - það er einmitt það sem gerir hann svo skemmtilegan í akstri; kattlipran og snöggan. Bíllinn er með áberandi sportlega aksturseiginleika óhlaðinn. Mondeo hefur ekki verið ekið lengi þegar maður fer að kunna vel við sig undir stýri og hafa verulega gaman af akstrinum. Þegar farið er út af malbikinu kemur í ljós að bíllinn fjaðrar þannig að hann heldur stefnu óáreittur þótt farið sé yfir holur og þvottabretti. Stýrið er hæfilega næmt, nokkuð þungt af vökvastýri að vera og gefur ákveðna tilfinningu fyrir rásfestu og öryggi. Lipur gírskipting ásamt frábærum bremsum og vel heppnuðum undirvagni eiga stóran þátt í akstursánægjunni; það er t.d. merkilegt hvað Mondeo hallar lítið í beygjum og heldur veggripinu lengi þótt honum sé jafnvel misboðið - aksturseiginleikinn minnir á suma ítalska bíla (áður en ryðið hafði tekið úr þeim burðinn). Sé Mondeo ekið með 4 fullvaxna farþega kemur í ljós að fjöðrun og bremsur standa fyrir sínu því aksturseiginleikar bílsins breytast merkilega lítið. 1,8 lítra 4ra sílindra bensínvélin er í tveimur útgáfum annars vegar 110 hö en hins vegar 125 hö. Fyrir þann sem notar bílinn að mestu leyti óhlaðinn nægir 110 ha vélin séu ekki gerðar miklar kröfur um snerpu og hröðun en þeim meiri um sparneytni. Mín skoðun er sú að flestir kysu Mondeo frekar með 125 ha vélinni og margir mundu hiklaust velja þennan bíl með 2ja lítra 145 ha vélinni þrátt fyrir aukakostnaðinn enda er hann þá orðinn einn af þeim sprækustu í flokki ,,heimilisbíla". Hvað varðar 4ra sílindra vélarnar (en Mondeo er fáanlegur með 2,5 og 3ja lítra V6-vélum, 170 - 200 hö) þá eru þær áberandi hljóðlátari í þessari kynslóð Mondeo en þær voru í bílnum af fyrstu kynslóðinni. Minna heyrist í vélinni í lausagangi og áberandi minna inni í bílnum þegar gefið er inn. Þar fyrir utan eru vélarnar þýðgengari - minni titringur merkjanlegur. Vindhljóð er undir meðallagi í Mondeo. Sparneytni Mondeo er í umtalsverð. Með 1,8 lítra vélinni fara innan við 7 lítrar á hundrað km í lengri akstri - jafnvel með talsverðum inngjöfum. Frekari upplýsingar ásamt verðlistum er að finna á vefsíðu umboðsins: http:www.brimborg.is |
