Farangurs- og flutningsrými er 1343 lítrar í Discovery sem auk þess getur dregið þyngri vagn en flestir keppinautar.

Land Rover á sér merkilega sögu og hefur verið á meðal algengustu vinnuhesta í mörgum heimsálfum frá því á 6. áratugnum. Á tímabili var Land Rover algengasti bíll í dreifbýli hérlendis og Range Rover einn af mest seldu lúxusbílunum. Eftir nokkurt hlé kemur Land Rover aftur og öflugri inn á íslenskan markað og hefur þegar skipað sér sess á meðal mest seldu fullvaxinna jeppa. Sú breyting hefur nú orðið að Land Rover er sameiginlegt vörumerki fyrir alla framleiðsluna. Þannig er Range Rover nú merktur ,,Range Rover by Land Rover", þ.e. ákveðin gerð af Land Rover.
Fyrir stríð og á stríðsárunum var Rover, eins og flestir aðrir bílaframleiðendur Breta, á kafi í hönnun og framleiðslu hergagna svo sem skriðdreka og torfærubíla. Sem dæmi má nefna að Rover vélar voru í ensku Conqueror og Centurion skriðdrekunum.
Maurice Wilks stjórnaði tæknideild Rover frá 1933 til 1957. Hann mun hafa átt frumkvæðið að hönnun og framleiðslu Land Rover jeppans. Fyrsti Land Rover jeppinn var sýndur 1948. Hann var með 1,6 lítra vél úr Rover P3. Grind og burðarhlutar í boddíi voru úr stáli en vegna skömmtunar á því var klæðningin úr áli og að mestu leyti fest með hnoðum.
Land Rover jeppinn varð brátt vinsælli en bjartsýnustu menn höfðu þorað að vona; seldist mun betur en Rover fólksbílar og salan jókst stöðugt fram til ársins 1963. Í apríl 1966 höfðu 500 þúsund Land Rover verið framleiddir og sá milljónasti 10 árum síðar.

Land Rover var framleiddur í alls konar útfærslum; stuttur,

Íslenskt vetrarveður gerir þá öfundsverða sem ferðast um í svona öflugu fartæki. Vegna þess hve yfirbyggingin er há virkar Discovery rúmbetri en ella.

langur, með bensín- eða dísilvél, sem pikköpp, yfirbyggður jeppi, sendibíll, óðalsvagn (station), sérhannaður sem lögreglubíll, slökkvibíll, dráttarbíll, landbúnaðartæki, vinnubíll fyrir veitustofnanir, sem herbíll í óteljandi útfærslum og þannig mætti áfram telja: Ótrúlega fjölhæft tæki.
Land Rover var keyrður í tví- eða fjórhjóladrifi, í lágu eða háu drifi. Mismunardrifum aftur- og framhásingar var hægt að læsa og það hafði hann strax umfram Willys. Aflúrtak var að aftan til að knýja tengd tæki og vélar. Í stuttu máli: Fjölhæft og sterkt far- og vinnutæki sem nú telst klassískt. Til Íslands komu fyrstu Land Rover á fyrstu árum 6. áratugarins og á tímabili var Land Rover alls ráðandi sem jeppi til sveita hérlendis. Einn sá fyrsti mun enn vera til.

ÞRENNS KONAR LAND ROVER

Land Rover var fyrst og fremst vinnutæki sem hægt var að treysta við aðstæður þar sem venjulegir bílar hefðu verið gagnslausir. Honum var aldrei ætlað hlutverk sem fólksbíll þótt hann gegndi því víða, t.d. í Afríku og Ástralíu. Fjöðrunin (blaðfjaðrir) var við það miðuð að jeppinn þyldi að falla hæð sína og koma niður á hjólin án þess að hásingar, fjaðrir eða demparar gæfu sig. Ekki er því að undra þótt Land Rover hafi ekki þótt þýður en hann var seldur hérlendis með sérstaklega styrktri fjöðrun. Innréttingin var gerð til að þola slark auk veðurs og vinda.
Til að breskir óðalseigendur gætu brugðið sér af bæ í betri fötunum og á viðunandi hraða án þess að hrista niður í sér nýrun, var lúxusjeppinn Range Rover hannaður og settur á markaðinn skömmu fyrir 1970. Sá var framleiddur lítið breyttur til ársins 1995, en þá kom nýr Range Rover (Bíllinn 1. tbl. 1996). Range Rover var lengi óumdeild fyrirmynd flestra nútíma lúxusjeppa.
Nú framleiðir Land Rover 3 gerðir jeppa. Þeir eiga það sameiginlegt að vera með fjórhjóladrif og tvískiptan millikassa, hátt og lágt drif, en eru að öðru leyti mismunandi:
Land Rover Defender er mjög sterkbyggt vinnutæki með sérbyggða grind, sérstaklega styrkta gormafjöðrun og hásingar með hálffjótandi öxlum. Defender er fáanlegur stuttur (2ja dyra, 90 tommur milli hásinga) eða langur (4ra dyra, 110 tommur milli hásinga).
Land Rover Discovery er lúxusjeppi, fáanlegur 2ja eða 4ra dyra en báðar útfærslur eru með sama hjólhaf (100 tommur á milli hásinga). Discovery kom fyrst á markaðinn 1989. Hann er með sama undirvagn (gormafjöðrun) og Range Rover, aðra yfirbyggingu og meira úrval vélbúnaðar.
Land Rover Range Rover er dýrasta gerðin. Undirvagninn er sá sami í grundvallaratriðum og í Discovery en loftpúðafjöðrun með mismunandi tölvustýringu er fáanleg auk alls konar lúxusbúnaðar. Frá 1995 er Range Rover með nýja yfirbyggingu og m.a. fáanlegur með 4.6 lítra V8-vél. Fram að 1995 var Range Rover einnig fáanlegur af lengri gerð (Vogue LSE).

MISMUNANDI VÉLAR

Discovery er fáanlegur hérlendis með þrenns konar vél: V8 bensínvél sem nú er með 4ra lítra slagrými, 2,5 lítra 113 ha túbódísilvél eða sömu vél 122 hö (við sjálfskiptingu). Sá Discovery sem Bíllinn hafði til prófunar var með V8 bensínvélinni og sjálfskiptur.

Á UPPLEIÐ

Í Bandaríkjunum er líflegur markaður fyrir jeppa. Þar er hins vegar meira framboð af bílum sem líta út fyrir að vera

jeppar heldur en af raunverulegum jeppum. Land Rover Defender og Discovery hafa hægt og sígandi verið að vinna sér sess á bandaríska markaðnum og er ástæðan ekki síst sú að þetta eru ósviknir jeppar; fartæki sem komast óbreytt lengra í torfærum en flest önnur.
Land Rover Defender 90 (stutti) var kosinn ,,Jeppi ársins" 1994 af bandaríska tímaritinu ,,Four Wheeler", fyrst og fremst vegna yfirburða eiginleika í torfæruakstri og Discovery í sama tímariti 1995 (,,Four Wheeler of the Year"). Það er athyglisvert að Discovery skyldi hlotnast þessi viðurkenning, en hana fékk hann ekki síst fyrir afburða getu sem torfærubíll, því hann var dýrastur þeirra bíla sem til greina komu. Í öðru sæti, með næstflest stig, varð 4ra dyra GMC Jimmy V6, í 3. sæti 2ja dyra Chevrolet Blazer V6 og í 4. sæti 4ra dyra Ford Explorer. Það vakti athygli að japönsku jepparnir komust ekki í undanúrslitin.

DISCOVERY

Land Rover Discovery er, eins og áður er nefnt, með sama undirvagn og var Range Rover fram að 1995. Discovery er því 10 tommum styttri á milli hásinga en lengri Defender (110). Discovery er grindarbíll og er hjólhafið það sama hvort sem yfirbyggingin er með 3 eða 5 dyrum. Heilar hásingar eru bæði að aftan og framan. Lokuð liðhús eru á framhásingu með tvöföldum hjöruliðum (,,constant velocity joints". Þeir hafa það framyfir venjulega einfalda hjöruliði að ekkert hraðaflökt myndast í þeim við beygju). Demparar eru innan í gormunum að framan en framan við gormana að aftan. Á framhásingunni eru togstífur (radíus-armar) samhliða grindinni aftan við hjólin. Þeir eru með tveggja punkta liðfestingu út við hjól að neðanverðu. Jafnvægisstangir eru á báðum hásingum og Panhard-stag sem heldur hásingunum stöðugum á þverveginn. Diskabremsur eru á öllum fjórum hjólum. Stýrið er vökvaknúið (snekkjumaskína). Millikassinn er með sítengt aldrif og læsanlegu mismunardrifi á milli hásinga (bæði í háa og lága drifinu).
Grindin er úr stáli. Helstu burðarhlutar yfirbyggingar eru einnig úr stáli en öll ytri klæðningin úr áli að undanskildum toppnum sem er úr stáli til að auka öryggi.
Bíllinn, sem við prófuðum er af gerðinni Discovery XS, 5 dyra með sæti fyrir 7. Vélin er 4ra lítra V8 með beinni innsprautun; 182 hö við 4750 sn/mín. Hámarkstog er 312 Nm við 3200 sn/mín. Sjálfskipting er 4ra gíra. Drifhlutfall er 3.54 :1. Lága drifshlutfallið í millikassa (LT-230T F/T) er 3.32 en 1.22 í háa. (Hlutfall 1. gírs í beinskipta 5 gíra kassanum er 3.32:1). Í XS-bílnum er mikill aukabúnaður, t.d. bæði sjálfvirkur hraðastillir, rafknúnar rúður, veltistýri, fjarstýrðar læsingar, þjófavörn, hljómtæki og ABS bremsur, en hins vegar ekki rafstýrðir og rafhitaðir framstólar (ES gerðin er með þann búnað auk annars). Bíllinn eins og við prófuðum hann, kostaði 3.580 þús. kr. Hjá B&L er ódýrasta gerðin af Discovery 5 dyra með 2,5 lítra 113 ha dísilvél og kostar 2.790 þús. kr.
Frá Land Rover kemur Discovery á 16" tomma stálfelgum, 7" breiðum og Michelin dekkjum af stærðinni 235/70HR16 (29" þvermál). Þau dekk hafa sérfræðingar erlendra tímarita talið einhver bestu dekk sinnar tegundar á markaðnum. Bíllinn sem við prófuðum var hins vegar með álfelgur og á breiðari 31" dekkjum frá Uniroyal. Bíllinn ber sig óneitanlega betur á hærri og belgmeiri dekkjunum.

AKSTURSEIGINLEIKAR

Discovery er mjög öflugur jeppi af óbreyttum bíl að vera. Nýtanlegt vélarafl, tog í lægsta gír og lága drifinu með læst mismunardrif, er meira en í mörgum öðrum lúxusjeppum. Skýringin er hugvitsamleg hönnun hjólabúnaðar, sem m.a. gefur stífu hásingunum mikinn hreyfanleika upp/niður og mikla spyrnu. Þannig nýtist stærsti kostur heilu hásinganna til fulls, þ.e. álagsþolið og þverstyrkurinn. Þá á það einnig sinn þátt í dugnaðinum að þungadreifing er hagstæð; 49% á afturhjólum og 51% á framhjólum. Um leið flögrar að manni hvílíkur ,,skriðdreki" Discovery yrði með jafn einfaldri viðbót og loftlæstu mismunardrifi á afturhjólum.
Slaglengd fjöðrunarinnar er áberandi í torfærum. Hins vegar er hún ekki meiri en gerist og gengur þegar farið er beint af augum. Tæknin minnir á Jaguar sem er mýkri en flestir aðrir hraðskreiðir bílar. Mýktin í Discovery er áberandi í venjulegum akstri - svipuð mýkt og einkenndi Range Rover frá upphafi. Yfirbyggingin vagar töluvert til hliðanna í beygjum en þó minna en í eldri Range Rover. Engu að síður svínliggur bíllinn í beygjum enda er þungamiðjan neðarlega. Dálítinn tíma getur tekið að venjast þessum hreyfingunum eða þar til bílstjórinn áttar sig á að þær eru eðlilegar; hjólin hafa fullt veggrip þótt manni kunni að finnast yfirbyggingin halla töluvert í kröppum beygjum.
Í akstri er Discovery mjög líkur 4ra dyra Range Rover; hraðskreiður og traustur ferðabíll með sterkan og sérkennilegan karakter. Um Discovery gildir það sama og um Range Rover að eftir að hafa lært á eiginleika bílsins og vanist þeim er leitun að þægilegri ferðabíl sem skilar manni á ákvörðunarstað á skemmri tíma án þess að það taki á taugarnar. Þeir sem þekkja Range Rover munu kunna vel við sig undir stýri á Discovery - þeir munu kannast við sig.
Bremsubúnaðurinn á Discovery er mjög öflugur, en mælikvarði á hann er t.d. mikill leyfilegur dráttarþungi. Diskabremsur eru á öllum hjólum; 11.8" diskar að framan en 11.4" að aftan. ABS læsivörnin er einn mikilvægasti öryggisbúnaður bílsins. Stöðvunarvegalengd á þurru malbiki, þegar klossbremsað er á 90 km hraða, mældist rétt innan við 34 m (um 7,5-föld lengd bílsins) og gerist varla betra. Hámarksöryggi veitir þó ABS-læsivörnin, ekki síst í hálku, annars vegar með því að tryggja virkustu stöðvun og gera bílstjóranum jafnframt kleift að stýra bílnum þótt staðið sé á bremsunni og hins vegar með því að vara bílstjórann við takmörkuðu hjólgripi með hljóðmerkjum.
Stýrisbúnaðurin er sá sami og í Range Rover; kúlusnekkja með vökvaaðstoð. Kosturinn við þennan búnað er mikill styrkur og álagsþol í torfæruakstri. Sá kostur er hins vegar á kostnað rásfestu í venjulegum þjóðvegaakstri. Discovery er, eins og eldri Range Rover, dálítið laus á miðjunni, eins og sagt er þótt það venjist.
Fyrirvara er nauðsynlegt að hafa á í þessu sambandi: Þessum bíl hafði verið breytt á vegum umboðsins þannig að í stað upphaflegra felga og Michelin dekkja var hann á álfelgum og 31" dekkjum frá Uniroyal.

VÉLIN

4ra (3.9 lítra) Rover V8 álvélina þekkja flestir sem áhuga hafa á jeppum og þarf ekki að fjölyrða um hana, flestir þekkja hana sem 3.5 lítra vélina í Range Rover. Í Discovery er hún með beinni innsprautun en kostur þess búnaðar í jeppa er m.a. sá að þynning andrúmslofts, vegna hæðar, hefur engin áhrif á gang vélarinnar auk þess sem hún gengur hnökralaust þótt bílnum sé ekið í miklum hliðarhalla.
Vélaraflið er takmarkað eins og við er að búast í vél með fremur litlu slagrými í stórum og þungum bíl. (,,Það er ekkert sem kemur í staðinn fyrir ,,cubic inches" í jeppa", segir Kaninn og veit hvað hann syngur). Rover hefur tekist að finna ágætan milliveg á milli afls og eyðslu sem gerir þennan hraðskreiða jeppa sparneytinn í samanburði við aðra stóra bíla. Í þessu tilliti villir hestaflatalan manni sýn. Þótt hámarksaflið sé 182 hö fæst það ekki fyrr en við 4750 sn/mín og af því skila sér um 150 hö til afturhjólanna.
Hámarkssnúningshraði vélarinnar (rauða strikið) er við 5500 sn/mín, þ.e. einungis 750 snúningum ofar. Sjálfskiptur Discovery V8i vegur 2025 kg. Það segir sig því sjálft að til að ná afli út úr vélinni og góðu viðbragði þarf að troða inngjöfina rösklega og miskunnarlaust. Vélin bregst hins vegar við án þes að mögla; seiglan er mikil og gangurinn alltaf jafn silkimjúkur og hnökralaus. Aflið er ekki rosalegt en nóg. Þessi vél hefur reynst mjög vel. Hún var upphaflega hönnuð um 1960 hjá Buick og hefur verið rósin í hnappagati Rover síðan 1970. Það segir sig sjálft að vélin er ekki lengur sambærileg við þær þróuðustu á markaðnum en stendur samt sem áður vel fyrir sínu en hafa ber í huga að stærstu jeppar (bandarískir) eru með 5.7-6.0 lítra V8-bensínvélar og yfir 7 lítra dísilvélar.
Þrátt fyrir tiltölulega litla vél er þessi stóri bíll enginn vonarpeningur hvað varðar snerpuna. Framleiðandinn gefur upp að viðbragðið sé 12.6 sekúndur frá kyrrstöðu í 100 km/klst. Okkar mæling (31" dekk) sýndi 14.5 sek og kvartmílutímann 19.5 sek (115 km/klst).
Eyðslan mældist um og innan við 19 lítrar í blönduðum (reynslu)akstri. Hafa ber í huga hve bíllinn er þungur og að hann er með sítengt aldrif. Sítengda aldrifið eykur eyðsluna um 1,0 - 1,5 lítra á hundraðið að meðaltali í bíl af þessari stærð/þyngd og ber að líta á það sem gjald fyrir aukið öryggi af sítengdu fjórhjóladrifi.

INNRÉTTING

Discovery er með áberandi fallega innréttingu. Sama er að segja um allan frágang svo sem á stjórntækjum og klæðningu; smekkleg hönnun og fallegt handbragð á sinn þátt í því að gera Discovery eigulegri. Ef til vill mætti staðsetja betur rofana fyrir rafknúnu rúðuvindurnar en þeir eru í lóðréttri stellingu á geymslustokknum á milli sætanna.
Tvennt vekur sérstaka athygli þegar sest er undir stýri á Discovery: Hátt húsið, tvær glærar þaklúgur (með sólhlífum) auk hliðarþakglugga og stórum rúðum gera bílinn sérlega bjartan að innan. Birtan eykur tilfinningu fyrir rými - gerir bílinn enn rúmbetri. Útsýn er meiri og betri en maður á að venjast í bílum af þessari gerð. Framstólarnir eru þægilegir; hæfilega bólstraðir og með stillanlegum stuðningi fyrir mjóhrygginn. Maður situr hátt í Discovery (82 sm eru frá jörð og upp á setu framstóls), með hnén beygð og þreytist því lítið þótt lengi sé ekið. Bílbeltin eru hin þægilegustu. Stýrið er í þyngra lagi eins og nú tíðkast en leggur á þannig að snúa má bílnum innan í hring með 11.9 m þvermáli.
Aftursætið er á upphækkun í gólfi vegna afturhásingarinnar (hjólhafið er einungis 2540 mm). Á móti kemur upphækkað þak en

Innréttingin er smekkleg en laus við prjál. Hönnun og frágangur er í sérflokki og sæmdi sér vel í dýrari bíl en Discovery. Einn af kostum innréttingarinnar er að hún er jafnframt hönnuð með vinnubíl fyrir augum - það er pláss umhverfis bílstjórann fyrir þá hluti sem vinnandi fólki tilheyra.

fyrir bragðið eykst útsýn og þægindi þeirra sem sitja í aftursætinu. Stutt hjólhaf eykur torfærugetuna en veldur því um leið að fótarými farþega er nokkru minna í aftursæti en í framsæti. Sætin má fella niður en aftan við aftursætið eru tveir samanfellanlegir stólar sem leggjast upp að hliðunum þegar þeir eru ekki í notkun (sæti fyrir 7).
Áklæðið í þessum bíl var að hálfu leyti skinn og að hálfu leyti vefjarefni og sýnist það vera praktísk og smekkleg samsetning.
Bakdyrnar eru mjög stórar og opnast hurðin út til hægri. Öflug stífa heldur við hurðina opna og smellur sjálf í og úr festu þegar rykkt er í hurðina. Varahjólið er geymt á bakhurðinni.
Miðstöðvarkerfið er öflugra en það sem áður var í bæði Land Rover og Range Rover; það er afkastameira og hljóðlátara. Kerfið er með aðgreinda hitastillingu fyrir bílstjóra og farþega í framsæti. Er það sams konar aðgreint kerfi og verið hefur m.a. í Benz og BMW.
Farangurs- eða flutningsrýmið, þegar aftursætið er fellt saman og fram og framsætin í miðstillingu, er ríflegt í Discovery. Breidd þess er 1080 mm, hæðin 1020 mm og lengdin 1220 mm (1343 lítra rúmtak). Hæð upp á hleðslugólf er 736 mm. En 206 mm eru upp undir lægsta punkt yfir vegi.
Þeir sem leita að praktískum vinnubíl af þessari stærð ættu að kynna sér Discovery. Hönnun innréttingarinnar tekur m.a. mið af sérþörfum verktakans, sölumannsins, eftirlitsmannsins, verkstjórans og annara sem þurfa að hafa með sér alls konar skjöl og dót vegna starfans. Geymsluhólf eru stór; bæði hanskahólf og hólf á milli stóla. Þeim til viðbótar eru flatir staðir ofan á miðju mælaborði og á milli stóla sem nýtast vel til frálags og geymslu vinnuplagga. Þessu til viðbótar er afar haganlega gerð geymsla fyrir ofan sólskyggnin þar sem stinga má plöggum, teikningum, kortum og öðru sem hafa þarf til reiðu.

BREYTINGAR?

Er hægt að breyta Land Rover Discovery í meiriháttar fjallajeppa? Svarið við þeirri spurningu ræður miklu um hver þróunin verður í endursöluvirði fullvaxins jeppa. Svarið er já; það má breyta Discovery á ýmsan hátt eins og sjá má á nokkrum vígalegum Range Rover fjallabílum hérlendis.

Þótt vélin sé ekki stór er aflið nægilegt til að halda drjúgum ferðahraða. Að því leyti er Discovery eins og Range Rover. Vélin er sérstaklega þýðgeng og seig.

Upphækkunarsett og annar endurbóta- og styrktarbúnaður fyrir undirvagninn er framleiddur af breskum og áströlskum fyrirtækjum og fæst hjá umboðinu og fleiri seljendum. Felgur eru fáanlegar af öllum stærðum og gerðum. Drifbúnaður, svo sem hlutföll og læsingar er til í úrvali. Frá Rover eru hlutföllin 4.7 og 3.54 en frá öðrum framleiðendum má fá 4.1, 3.8 og 2.83. Á meðal kosta hásinganna undir Land Rover er að drifköggullinn, kambur, mismunardrif og pinjón, er losað sem ein heild úr hásingunni eins og í Toyota, Ford og fleiri jeppum. Því er fljótlegt og einfalt að skipta um hlutföll (séu þau höfð til skiptanna); hjól af, öxlar út, drif út - drif inn, öxlar inn, hjól á - og punktur basta. Á Defender, sem er með Salisbury drif og hálffljótandi öxla þarf ekki einu sinni að taka hjólin af að aftan til að skipta um drifhlutföll.
Um vélina er það að segja að í Bretlandi er til allt sem hugurinn girnist; Rover V8 er því jafn auðvelt að ,,tjúna" og Chevrolet 350. Eins og í Range Rover er nóg pláss í húddinu fyrir miklu stærri vél; jafnvel 6.2ja lítra GM dísill með tveimur pústþjöppum (275 hö) kemst fyrir í Discovery og staðlaður breytingabúnaður fyrir vélaskiptin er fáanlegur.

NIÐURSTAÐA

Land Rover Discovery tekur við hlutverki þess Range Rover sem íslenskir bílaáhugamenn hafa þekkt í rúm 25 ár. Range Rover aðdáendur verða ekki fyrir vonbrigðum því Discovery er betri en eldri Range Rover. Stærsti kostur Discovery, fyrir utan hagstætt verð, er að í honum sameinast þægindi og útlit lúxusjeppans og styrkur og álagsþol vinnuþjarks, auk þess sem hann er einstakur ferðabíll sem beita má hiklaust og af öryggi í torfærum.

KEPPINAUTAR?

Discovery hefur ákveðna sérstöðu á markaðnum; stór grindarjeppi með heilar hásingar, gormafjöðrun, snekkjustýrisvél, V8-vél og sídrif. Ef ekki væri vegna grindarinnar vildi ég helst bera hann saman við Jeep Grand Cherokee Ltd. sem er einnig með heilar hásingar en einni milljón dýrari en Discovery XS. Annar hugsanlegur keppinautur væri Nissan Patrol Wagon með 4,2ja lítra bensínvélinni, en hann er að mörgu leyti sambærilegur, a.m.k. hvað varðar tæknilega útfærslu, afl og styrk. Hann er hins vegar einnig milljón krónum dýrari en Discovery XS. Sem jeppi hefur Discovery marga kosti umfram Mitsubishi Pajero og er jafnframt laus við verstu ókostina. Því tel ég Pajero ekki með keppinautum. Þá er einn eftir sem er á grind, með heilar hásingar, sídrif, Benz bensínvél, að vísu með tannstangarstýri og snerilfjöðrun að framan en virðist að sumu öðru leyti sambærilegur hvað varðar afl, styrk og verð. Það er Musso E 32 sem kostar 3.790 þús. kr, þ.e. 200 þús. kr. meira en Discovery XS. Að vísu er Musso nýr bíll en Discovery býr að langri hefð Land Rover. Lítum samt nánar á þann samanburð í meðfylgjandi töflum og látum Nissan Patrol fljóta með (til frekari tæknilegrar viðmiðunar fyrir þá sem pæla í torfærujeppum).

www.bl.is

Netfang höfundar

Til baka á forsíðu

Fleiri greinar um bílaprófanir