JEEP CHEROKEE/GRAND WAGONEER

Grand Cherokee og Grand Wagoneer frá Chrysler eru, að margra dómi toppurinn í lúxusjeppum.

Þessi fjórhjóladrifni heimilsbíll eða sportjeppi (sem var reyndar einnig seldur í Bandaríkjunum (frá 1985) einugis með drif á afturhjólunum) kom á markaðinn sem nýr bíll frá grunni sem árgerð 1984. Þá var framleiðandinn American Motors Corp. (AMC) sem Chrysler keypti síðar og innlimaði. Bíllinn átti fátt sameiginlegt með eldri Cherokee/Wagoneer nema nafnið enda allur nettari, léttari og liprari. Jeep Cherokee/Wagoneer var einungis fáanlegur með 4ra sílindra línuvél eða 2,8 lítra V6-vél fram að árgerð 1986 en þá kom 6 sílindra línuvél. Cherokee/Wagoneer (C/W) er fyrsti sportjeppinn sem nær umtalsverðri sölu og segja má að hann hafi rutt brautina fyrir þessa tegund bíla; nánast skapað nýjan markað sem jókst á þeim 9 árum sem bíllinn var framleiddur nánast óbreyttur. Það var ekki fyrr en með árgerð 1993 að nýr C/W kemur á markaðinn (Grand Cherokee/Grand Wagoner og þá fyrst fáanlegur með 5.2ja lítra V8-vél frá Chrysler. Það er reyndar sama V8-vélin og Chrysler hefur notað í ýmsum útgáfum og útfærslum allar götur frá 1956; vél sem hefur reynst vel og m.a. skilað Crysler nokkrum meistaratitlum í frægum aksturskeppnum.

(Það var t.d. Cherokee (að vísu pickup) sem ekið var upp á tind Öræfajökuls í apríl 1991.)

VÉLAR

V8-vélin frá og með árgerð 1993 (212- 220 hö við 4800 snm.) er veruleg endurbót. Ástæðan er sú að 4ra sílindra 2,5 lítra vélin (upphaflega 121 ha og síðar 132 ha)  og V6-vélin voru of kraftlitlar, sérstaklega 4ra síl. með sjálfskiptingu. 6 sílindra línuvélin (4ra lítra með beinni innsprautun) var hins vegar nægilega öflug (177 ha og síðar 193 ha) og reyndar vel það, en eyðslufrek. 2,5 lítra túrbódísilvél (115 hö) var einnig fáanleg en náði aldrei vinsældum, a.m.k. ekki í Bandaríkjunum. Þrátt fyrir upphaflega hönnun frá 6. áratugnum hefur 5,2ja lítra Magnum (318 kúbika) V8-vélin frá Chrysler (nefnist A-vélin á þeim bæ) verið þróuð og endurbætt stig af stigi með góðum árangri. Hún var t.d. upphaflega 277 kúbik (í Plymouth Fury 1956) síðan 273 kúbik, þá 318, 340 og 360, og er, með þeim tæknibúnaði sem nú tíðkast, líklega ein sparneytnasta bensínvél sem fáanleg er í jeppa miðað við afl og tog. Hún er t.d. áberandi sparneytnari en 6 sílindra vélin í Cherokee. Og til þess að það valdi engum misskilningi skal það ítrekað að eyðsla jeppa er sú eyðsla sem mælist við erfiðustu aðstæður eins og þegar bíllinn erfiðar t.d. með kerru í drætti. Það skyldi ekki koma á óvart þótt Cherokee með V8-vélinni færi fullhlaðinn upp Kamba á færri lítrum bensíns en Cherokee með með 2,5 lítra vélinni með sömu hleðslu og á sama tíma. Það er nefnilega tog vélarinar sem skiptir sköpum þegar átaks er þörf. V8-vélin er með 399 Nm tog við 3600 snm.

DRIFBÚNAÐUR

Cherokee/Wagoneer er til með tvenns konar fjórhjóladrifsbúnaði: Annars vegar með valdrifi (Command Trac), en þá er hægt að aka bílnum afturhjóladrifnum eða fjórhjóladrifnum. Sá búnaður þekkist á framdrifslokunum sem fylgja honum, en þær aftengja framdrifið hjólnöfunum þegar afturdrifi er valið. Á nýrri bílunum eru framdrifslokurnar sjálfvirkar. Hins vegar með tvenns konar aldrifi (Selec-Trac eða Quadra-Trac), en þá er bílnum alltaf ekið í fjórhjóladrifi og sérstakt mismunardrif í millikassa látið jafna átaki á milli fram- og afturhjóla. Munurinn á þessum drifkerfum er sá að Selec-Trac er með venjulegu mismunardrifi í millikassa (sem má læsa föstu) en Qudra-Trac kerfið er með viðnámskúplingu í millikassanum (seiglæsingu) og því sítengt. Beinskipti kassinn, sem oftast er við 2,5 lítra vélina er 5 gíra alsamhæfður. Sjálfskiptingin í fjórhjóladrifnu bílunum, án tillits til millikassans, er Chrysler Torqueflite (A-727) 4ra gíra. Í nýrri bílunum, frá 1993 er tölvustýring og 5. gírinn myndaður með túrbínulæsingu (læsingin virkar einnig í 3. gír). 727-skiptingin er yfirleitt talin með bestu sjálfskiptingum á markaðnum.

FJÖÐRUN - UNDIRVAGN

C/W er með heilar hásingar að framan og aftan og fjaðrar á gormum. Hásingunum er haldið með örmum sem koma á þær bæði ofan og neðan frá. Fjöðrunin er mjúk og veghljóð hverfandi. Vökvastýrið er snekkjuvél. Mörgum finst það í léttara lagi. Þótt það sé létt er C/W mjög stöðugur og öruggur bíll í akstri en liprari en flestir aðrir jeppar í borgarakstri. Bremsur eru af hefðbundinni gerð, með diska að framan en skálar að aftan og með eða án ABS.

FYRIR HVERN

Einn af stærstu kostum Cherokee/Wagoneer er að hann er grindarlaus. Fyrir bragðið er hann rúmbetri, léttari og þægilegri þrátt fyrir góða fríhæð yfir vegi en flestir aðrar (ef ekki allir) jeppar. Þeir sem kunna að meta þægindi amerískra bíla munu kunna vel við þennan bíl, í þeirra augum er C/W einn allra þægilegasti jeppinn í daglegri notkun. Sá ókostur fylgir grindarlausum jeppum og þeim undirvagni sem er í C/W að þeir geta verið þungir í endursölu - þeir sem kaupa notaða jeppa til að breyta velja undantekningarlaust þær tegundir jeppa sem eru byggðir á grind. Af þessu leiðir að afföll af þessum bílum nýjum eru mjög mikil en hins vegar er leitun að betri kaupum í notuðum lúxusjeppa, ekki síst vegna þess að flestir þessara bíla eru mjög ríkulega búnir eins og tíðkast með bandaríska bíla. Það má fá mjög vel búinn Jeep Grand Cherokee fyrir 30 þús. dollara í Bandaríkjunum en sambærilega búinn Hins vegar kostar þar sambærilega búinn Toyota Land Cruiser, en með 6 sílindra vél, 40 þús. dollara. Hérlendis bera bandarískir bílar sérstakan refsitoll sem er í því fólginn að mismuna bílum með tollflokkun eftir slagrými vélar, en eins og allir vita eru vélar í bandarískum bílum yfirleitt með meira slagrými en t.d. vélar í evrópskum eða japönskum bílum. Þegar talað er um gæði bíla, t.d. við samanburð á gæðum eða því hve mikið fæst fyrir peningana við kaup á bíl, ætti að hafa í huga hve mikið venjulegur Bandaríkjamaður greiðir fyrir bílinn. Stærstur hluti C/W-jeppanna hérlendis er fluttur inn notaður frá Bandaríkjunum og það skýrir vinsældir bílsins, þeir sem hafa keypt þessa bíla ríkulega búna og verið heppnir hafa undantekningarlaust fengið mjög mikið fyrir peningana - gert mjög góð kaup. Gallar eða síbilanir í þessum bílum eru fátíð, gangöryggið og endingin mikil og vegna þess að þeir eru tiltölulega einfaldir að grunnbyggingu (afstætt hugtak) er aldrei neitt vandamál að fá varahluti og vegna þess að margir flytja inn varahluti í þessa bíla eru eigendur ekki háðir verðlagningu umboðs, þeir geta t.d. keypt flesta varahluti hjá Bílabúð Benna, Bílabúð Rabba eða í Bílanausti.

Með V8-vélinni eru þetta öflugir jeppar þótt þeir séu ekki byggðir á grind.

NIÐURSTAÐA

Í þessari grein er fjallað um eldri Cherokee/Wagoneer (2 nýir hafa komið á markaðinn síðan). Skipti endursala ekki máli, þ.e. ef þú gerir ekki ráð fyrir því að þurfa að selja bílinn fyrirvaralaust, og langar til að eiga góðan ferðajeppa skaltu fara á stúfana og kynna þér framboðið á notuðum Grand Cherokee eða Grand Wagoneer. Þú gætir gert betri kaup en þig grunar og eignast þægilegri og skemmtilegri bíl en þig óraði fyrir - það er nefnilega merkilegt hvað fordómar geta falið mikil lífsgæði fyrir sumu fólki.

Leó M. Jónsson.

Netfang höfundar

Fleiri greinar um bíla

Til baka á forsíðu