|
Prófun:
Leó M. Jónsson vélatæknifræðingur.
BMW
320i Touring
Sá BMW 300 Station sem enn er við lýði kom
sem nýr bíll á markaðinn af árgerð
1996. Endurbætur voru talsverðar, m.a. breiðari afturhluti
sem jók innanrýmið. Samt sem áður er BMW
318/320i Touring með takmarkaðra farangursrými en margir
keppinautar í flokki stationbíla.
Það fer ekkert á milli mála að þessi
BMW þristur er enn í fullu gildi árið 2004 þótt
hann sé ef til vill ekki nýtískulegur í
samanburði við bíla á borð við Renault
Laguna - og ekki telst hann heldur með rúmbestu stationbílum.
En gæði bílsins leyna sér ekki. Það
skyldi því ekki koma á óvart að BMW-3
er dýrari en flestir aðrir bílar af millistærð.
Vélar
Hafi einhver haldið að 4ra sílindra BMW station sé
einhver sleði þá er það misskilningur. Vélin
í 318i er með 1796 rsm slagrými og skilar 118 hö
við 5500 sn/mín. Hámarkstogið er 170 Nm við
3900 sn/mín. Með þessari vél er krafturinn viðunandi
en má ekki minni vera, jafnvel með beinskipta 5 gíra
kassanum. 320i er hins vegar með 4ra sílindra 2ja lítra
vél sem skilar 143 hö við 6000 sn/mín og hámarkstogi
200 Nm við 3750 sn/mín. Með sjálfskiptingunni,
sem jafnframt má handskipta, er þessi 1385 kg 320 stationbíll
hins vegar kraftmikill. Það er t.d. áberandi hvað
þessi aflsmunur, sem þó er ekki nema 25 hestöfl,
gerir 320-bílinn liprari, sneggri og, að mér finnst,
öruggari. Mismunurinn á bílunum er talsvert meiri
en en mismunur hestaflatölunnar segir til um. Skýringin
liggur í vélstýrikerfinu, Motronic frá Bosch
en það er forritað með sparneytni sem frumforsendu
í 318i en afköst í 320i. Þessar 4ra sílindra
BMW-vélar eru bæði traustar og vandaðar; 16 ventla
vélar með öllum þeim tæknibúnaði
sem nú tíðkast. Báðar eru áberandi
þýðgengar.
Viðbragð - afköst
BMW 320i Touring er 9,3 sek. að ná 100 km. hraða frá
kyrrstöðu. Hámarkshraðinn er 218 km/klst. Mæld
eyðsla í lengri akstri á þýskri hraðbraut
er 7,2 lítrar á hundraðið með sjálfskiptingunni.
Athygli vekur hve lítill staðalbúnaður er innifalinn
í verði nýs BMW 320i Touring. Það fyrirkomulag
dylur hátt verð bílsins. Sá sem prófaður
var var þó búinn spólvörn (DSC), en
hún hefur verið staðalbúnaður síðan
2001, sem gerir bílinn merkjanlega stöðugri í
rásinni og án efa öruggari í vetrarakstri.
Öryggi er ofarlega á blaði hjá BMW eins og vænta
má. Þessi station-bíll fékk t.d. 4 stjörnur
fyrir öryggi í svonefndri Euro Ncap-prófun. Auk alls
venjulegs öryggisbúnaðar eru 6 loftpúðar
í árgerð 2004.
Stærð - rými
Heildarlengd bílsins er 4,47 m. Breiddin er 1,74 og hæðin1,42
m. Hjólhafið er 2,7 m. Þessi ytri mál segja
ef til vill ekki mikið. Hins vegar kemur manni dálítið
á óvart að innra rýmið skuli ekki vera
meira, sérstaka athygli vekur hve farangursrýmið í
þessum station-bíl er takmarkað, nánast ekki
meira en sæmilegt fyrir meðalstóran hund. Hins vegar
er þar að finna ýmsar hirslur og festikróka
sem koma að góðum notum. Ég sló máli
á bilið á milli hjólskálanna og reyndist
það vera 835 mm sem er 50 mm minna en í Renault Laguna
station og Benz C-T. Varahjólið er undir hlera í gólfinu
og hólfið vel einangrað sem finnst á því
að þetta dæmigerða boddíhljóð
sem oft hefur fylgt station-bílum heyrist ekki. Lárétta
tjaldið sem draga má yfir farangursrýmið virkar
jafnframt sem hljóðdeyfing.
Rými bílstjóra er eins og það á
að vera, stjórntækin eins og maður á að
venjast í BMW og stólarnir einstaklega þægilegir
með upphitun, hæðarstillingu og hallastillingu setu, stillanlegum
stuðningi við mjóbak auk venjulegra stillinga.
Útlit og akstur
BMW 320i Touring er án efa einn af fallegri station-bílum
af millistærð - línan í þessum bíl
er stílhrein og hann hefur tvímælalaust yfirbragð
nýs bíls. Þótt hönnunin sé ekki
spónný eru engin ellimerki á BMW 320i Touring.
Aksturseiginleikarnir eru dæmigerðir fyrir BMW, bíllinn
er hæfilega mjúkur þegar ekið er beint af augum
en um leið og lagt er á breytir fjöðrunin um karakter
- verður stinnari og sportlegri. Slaglengd fjöðrunarinnar
er meiri í þessum BMW en gerist og gengur, árangurinn
er áberandi mikið veggrip sem lýsir sér t.d.
í því hve hratt má aka þessum bíl
á mjög vondum malarvegi. Rásfesta er yfir meðallagi,
bílinn er lítt næmur fyrir hliðarvindi og vingnauð
og veghljóð á ferð með minnsta móti.
Högg í stýri þegar farið er yfir skarpar
brúnir á malbiki virðist ætla að fylgja
300-bílnum og furðulegt að þetta skuli ekki vera
búið að laga þennan hvimleiða mínus
á svo annars vönduðum bíl.
Athygli vekur að BMW mælir með því að
20 þúsund km. séu látnir líða
á milli þjónustu, m.a. á milli smurolíuskipta.
Ég myndi aldrei nota sömu smurolíu lengur en 10 þús.
km. - kaupi frekar ódýrari smurolíu og skipti oftar.
Þessi 20 þúsund km. þjónustubil virðast
vera einhver sölutrikk til að blekkja þá nískustu
á meðal kaupenda.
Fleiri
greinar um bílaprófun
Aftur
á forsíðu
Netfang höfundar
|
