Reynsluakstur: Ný Toyota Corolla 1.6, 3d beinskiptur 5g.
Leó M. Jónsson vélatæknifræðingur.

Hvers vegna er Toyota Corolla metsölubíll ?

Toyota Corolla er margfaldur metsölubíll hérlendis. Engum dettur í hug að það sé að ástæðulausu. Það er heldur ekki að ástæðulausu að Toyota Corolla hefur hvergi í Vestur-Evrópu, nema ef væri í Noregi, verið efst á lista yfir söluhæstu fólksbíla í þessum stærðarflokki. Sem dæmi má nefna að á markaðinum í Þýskalandi, sem þykir sérstaklega kröfuharður gagnvart innfluttum bílum, var Mazda lengst af mest seldur af japönskum bílum en ekki Toyota og markaðshlutdeild Toyota í Þýskalandi hefur ekki verið nema tæpur helmingur af markaðshlutdeild Renault þar í landi í meira en áratug.

Þegar litið er yfir umsagnir bílablaðamanna í Bretlandi, í Danmörku og í Svíþjóð um nýja Toyota Corolla er tónninn kunnuglegur en sameiginlegt álit þeirra á nýja Corolla er að hann sé ekki eins karakterlaus og óspennandi og fyrirrennarinn. Sameiginlegt álit þeirra á Toyota Corolla er að hann sé leiðinlegur en gangviss. Oftast er hann borinn saman við Peugeot 307 og þá undantekningarlaust til að sýna hvernig Toyota hefði getað lært af Peugeot sem jafnframt er þar ódýrari. Mér finnst þessi afstaða, t.d. danskra bílaskrifara sem ég hitti oft hér áður þegar ég prófaði nýja bíla erlendis, bera keim af fordómum gagnvart japönskum bílum sérstaklega, þeir virðast t.d. ekki hafa sömu fordóma gagnvart bílum frá Suður-Kóreu sem hlýtur að teljast athuglisvert.

Fyrir Íslendinga, sem hafa tekið álíka ástfóstri við Toyota Corolla og fótanuddtækið forðum, er mjög skrýtið að lesa umsögn erlendra bílasérfræðinga og alveg sérstaklega þegar hún er borin saman við umsögn íslenskra bílaskrifara - og er engu líkara en að ekki sé verið að fjalla um sama bílinn. Það er t.d. dæmigert fyrir íslenska fjölmiðla að kjósa nýja Toyota Corolla ,,Bíl ársins 2002" (en bíll ársins 2002 í Evrópu er Peugeot 307).

Mér finnst áhugavert að bera saman skrif Allans Graubæk hjá Politiken í Danmörku um nýjan Toyota Corolla (www.politiken.dk) og umfjöllun DV og Morgunblaðsins um sama bíl - því það er engu líkara en að ekki geti verið um sama bílinn að ræða.

Það eru gömul og ný sannindi að orstír bíltegundar ræðst af gæðum þjónustunnar. Í því efni má benda á að í Danmörku hefur Citroën verið toppsölubíll

	Nýja Corollan þykir snaggaraleg í akstri.

og með hátt endursöluverð í hálfa öld. Citroën-þjónustan í Danmörku hefur lengi verið talin skólabókardæmi um hvernig skuli skipuleggja og halda uppi góðri þjónustu fyrir bíla. Og þótt það sé útúrdúr þá lærði stofnandi Citroën-umboðsins í Danmörku ekki þjónustustjórnunina hjá Citroën í Frakklandi heldur í General Motor Service Institute í Michigan í Bandaríkjunum.

Ein af ástæðunum fyrir vinsældum Toyota Corolla á Íslandi er betri þjónusta en fyrir aðrar tegundir bíla yfirleitt. Bilanatíðni Corolla er sögð vera lág. Ekki er hægt að vísa í neinar hlutlausar rannsóknir á bílanatíðni bíla hérlendis. Tíðni athugasemda við lögbundna skoðun segir t.d. ekki nema hluta af sögunni þar sem sú skoðun nær ekki til nýrra og nýlegra bíla. Þá rugla margir saman hugtökunum bilanatíðni, athugsemdatíðni og kvartanatíðni. Það er tíðni og fjöldi kvartana á ábyrgðartíma sem hefur mest áhrif á ánægju kaupenda, tryggð þeirra við tegundina og orðstír hennar.

Þeir sem kunna til verka við rekstur bílaumboðs, og hafa metnað fyrir hönd viðkomandi bíltegundar, skipuleggja forskoðun bíla fyrir afhendingu þannig að sem minnstar líkur séu á kvörtunum eftir afhendingu. Þetta er þáttur sem sum bílaumboð virðast aldrei ná tökum á.

Kostir Corolla (sem aldrei er minnst á)
Það má vel vera rétt hjá bílaskrifurum í nágrannalöndum að Toyota Corolla sé ekki jafn skemmtilegur í akstri og t.d. franskir og þýskir bílar. Án efa kaupir hópur fólks bíl vegna þess að því finnst útlit hans spennandi og pælir þá væntnalega lítið sem ekkert í því hvort viðkomandi bíll sé hagkvæmur (endursöluverð, verð á þjónustu, ábyrgðartími, orðstír) og nægir að nefna fólk sem keypti Fiat með eins árs ábyrgð þegar 3ja ára ábyrgð var á flestum keppinautum. Hins vegar þori ég að fullyrða að fáir kaupa bíl af svipaðri stærð og Toyota Corolla einungis vegna þess að þeim finnist hann skemmtilegur í akstri.

Frá tæknilegu sjónarmiði séð hefur Toyota Corolla ótvíræða kosti umfram suma evrópska keppinauta og á þá kosti minnast bílaskrifarar yfirleitt aldrei - sennilega vegna þess að fæstir þeirra hafa tæknilega þekkingu á bílum (með bílaskrifurum á ég við þá sem fjalla um bíla í prentmiðlum eða netmiðlum en ekki ,,gínurnar" sem bulla um bíla í sjónvarpi og auglýsa fatnað um leið).
Þeir kostir sem Corolla hefur umfram marga keppinauta er þjónustuvæn hönnun - en það er hún sem ræður því hve lengi bílvirki er að þjónusta og/eða gera við bílinn. Ég skal nefna eitt sláandi dæmi máli mínu til sönnunar - atriði sem bílkaupanda er örugglega ekki bent á. Í ákveðnum þýskum bíl þarf að losa aðra vélarfestinguna og setja stoð undir vélina til að hægt sé að skipta um reimina sem knýr alternatorinn og dælur. Það tekur vanan mann a.m.k. 2 klukkustundir að skipta um tímareim í ákveðnum frönskum bíl en innan við hálftíma í Corolla 1.6. Við hönnun á Corolla hefur verið leitast við að haga hlutum þannig að reglubundið viðhald megi framkvæma á sem stystum tíma. Þeir sem þekkja til bílaviðgerða vita að séu viðgerðir einfaldar minnkar jafnframt hætta á mistökum og gæði þjónustunnar verða meiri.

Af þessum ástæðum er hægt að skipuleggja og byggja upp þjónustu fyrir Toyota sem er bæði ódýrari og af meiri gæðum en gengur og gerist. Af því leiðir að bíllinn verður vinsælli, orðstír hans góður og endursöluverð hátt. Það er því, að mínu mati, þjónustan sem ræður því hvort bíll verður metsölubíll mörg ár í röð.

Eitt atriði vil ég nefna enn sem styður þessa fullyrðingu mína. Eins og margir fyrrum lesendur Bílsins muna prófaði ég nokkra bíla 100 þúsund kílómetra akstur og bar saman reksturskostnaðinn. Einn þessara bíla hélt ég áfram að nota. Það var Renault Clio 1.2 árgerð 1991. Þann bíl seldi ég í fullu fjöri eftir að hafa ekið honum 250 þúsund km á tæpum 10 árum. Ég sá sjálfur um allt eftirlit og viðhald með þeim bíl og fór þar nákvæmlega eftir bókinni frá Renault. Þessi Clio er besti smábíll sem ég hef átt, bilanatíðni hans var lægri en ég hef áður kynnst og kostnaður á ekinn km sá lægsti sem ég þekki. Mín niðurstaða er því sú að væri þjónustan fyrir Renault nógu góð gæti hann verið metsölubíll hérlendis ár eftir ár.

Ný Corolla
Árið 1988 reynsluók ég í Luxemburg nýjum Corolla ásamt fleiri blaðamönnum í boði Toyota. M.a. var ekið á þýskum hraðbrautum. Sú breyting sem þá hafði oðið á Corolla var áberandi mikil, sérstaklega hvað varðaði aksturseiginleika t.d. til hraðaksturs og varðandi hljóðeinangrun. Sá breytti Corolla sem nú er nýkominn á markaðinn er 3. kynslóð talin frá 1988 árgerðinni. Endurbætur eru umtalsverðar og vekur ekki síst athygli hve evrópskur bíllinn er orðinn í útliti. Deilt verður um hvort nýji Corolla sé fallegur eða ljótur eins og gengur. Lagið á bílnum er áberandi en það gerir hann mjög rúmgóðan. 3ja dyra bíllinn er með stórar hliðardyr þannig að mjög auðvelt er að komast inn í bílinn - einnig í aftursæti. Setur framstólanna eru fremur háar þannig að auðvelt er að komast inn í og útúr bílnum.

Eftir fyrsta aksturinn tekur maður eftir tvennu sem hefur breyst; annars vegar er snerilstyrkur þessa nýja Corolla áberandi meiri en fyrirrennarans en það gerir bílinn m.a. stöðugri í akstri og hins vegar er hljóðeinangrunin meiri og betri. Mjög góðir aksturseiginleikar þessa nýja Corolla komu mér á óvart.

Dæmigerð karaktereinkenni Corolla eru til staðar svo sem vökvastýri sem er mjög létt, áberandi stuttar gírgáttir og látlaust mælaborð. Sumum finnst þessi atriði gera bílinn minna spennandi. Ég er hins vegar sammála hinum sem segja að það sé einmitt þessi atriði sem geri Corolla lipran. Og þá er ótalinn stærsti kostur þessa bíls og sá sem mér finnst gera hann með skemmtilegri bílum í snatti en það er vélin. Þessi 4ra sílindra 16 ventla 1600-vél skilar 110 hö við 6000 sn/mín. Það segir manni ef til vill ekki nema hluta af sögunni því varla fer maður að þenja vélina í 6000 snúninga nema fyrir slysni. En það er snerpan í vélinni og seiglan (hámarkstogið er 150 Nm við 4800 sn/mín) sem skipa henni í sérflokk; við inngjöf rýkur vélin upp í snúningi og byggir upp vaxandi tog og vinnslu upp í gegn um gírana. Hámarkshraðinn er 190 km/klst. Það sem segir meira um þessa vél er að snerpan 0-100 km/klst er 10,2 sek í þessum bíl sem vegur rúm 1000 kg. Eyðslan í blönduðum akstri er aðeins um 7 lítrar á hundraðið.

Þessi vél, sem er með einum ofanáliggjandi kambási, er með breytilegt opnunarferli ventla. þá tækni nefnir Toyota VVT-i (Variable Valve Timing-injection) en hún, ásamt tölvustýrðir kveikjun og innsprautun, skýrir þessa eiginleika vélarinnar.

Valkostir
Nýja Corolla er fáanleg 3ja eða 5 dyra eða 5 dyra station. Ódýrastur er 3ja dyra með 1400 vél (97 hö) á 1600 þúsund krónur. Sami bíll með 1600 vélinni kostar 1650 þús en það er sama verð og á Peugeot 307 3ja dyra með 110 ha vél. Station-bíllinn með 136 ha 1800 vél kostar um 1900 þús. kr.

www.toyota.is

Netfang höfundar:leo@leoemm.com

Fleiri greinar um bíla

Til baka á forsíðu